mk Logo

തിരുവനന്തപുരം: ഇടവേളയ്ക്ക് ശേഷം കേരളത്തില്‍ വീണ്ടും കോവിഡ് മരണം. തിരുവനന്തപുരത്ത് കഴിഞ്ഞ ഏഴുദിനത്തിനിടെ രണ്ട് വയോധികരായ പുരുഷന്മാരാണ് കോവിഡ് ബാധിച്ച് മരിച്ചത്. ഹൃദ്രോഗ ചികിത്സയില്‍ ഉണ്ടായിരുന്ന ഇവരുടെ കോവിഡ് പരിശോധനാ ഫലം പോസിറ്റീവ് ആയിരുന്നു. 2024-ല്‍ ഇതുവരെ സംസ്ഥാനത്ത് 76 കോവിഡ് മരണങ്ങള്‍ റിപ്പോര്‍ട്ട് ചെയ്തതായും, ഈ മാസം മാത്രം 182 പുതിയ കേസുകള്‍ സ്ഥിരീകരിച്ചതായും ആരോഗ്യമന്ത്രി വീണാ ജോര്‍ജ് വ്യക്തമാക്കി. കോട്ടയം (57), എറണാകുളം (34), തിരുവനന്തപുരം (30) ജില്ലകളിലാണ് ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്തത്. സംസ്ഥാനത്ത് രോഗലക്ഷണമുള്ളവര്‍ കോവിഡ് പരിശോധനക്ക് വിധേയരാകണമെന്ന് ആരോഗ്യവകുപ്പ് നിര്‍ദേശിച്ചു. സംസ്ഥാനത്തിലെ കോവിഡ് സാഹചര്യം വിലയിരുത്താന്‍ സ്റ്റേറ്റ് ലെവല്‍ റാപ്പിഡ് റെസ്പോണ്‍സ് ടീം യോഗം ചേര്‍ന്നു. ദക്ഷിണ പൂര്‍വേഷ്യന്‍ രാജ്യങ്ങളില്‍ കോവിഡ് വ്യാപനം ഉയരുന്ന പശ്ചാത്തലത്തില്‍, കേരളത്തിലും ജാഗ്രത തുടരണമെന്ന് ആരോഗ്യ മന്ത്രി അറിയിച്ചു. ജലദോഷം, ചുമ, തൊണ്ടവേദന, ശ്വാസതടസം എന്നിവ അനുഭവപ്പെടുന്നവര്‍ നിര്‍ബന്ധമായും മാസ്‌ക് ധരിക്കണമെന്ന് മുന്നറിയിപ്പില്‍ പറയുന്നു.